ಮುರುಕು ಮಂಚ … (ಉತ್ತರ ಕನ್ನಡದ ಗಾದೆ – 117)

ಮುರುಕು ಮಂಚ ಹೊತ್ತು ದನ ಕಾಯುತ್ತೀಯಾ ಅಥವಾ ಒಡಕು ಗಡಿಗೆಯಲ್ಲಿ ನೀರು ತರುತ್ತೀಯಾ?

ಒಂದೇ ಮುರುಕು ಮಂಚವನ್ನು ಹೊತ್ತುಕೊಂಡು ದನಗಳನ್ನು (ಹಸುಗಳು) ಕಾಯಬೇಕು. ದನಗಳು ಎಲ್ಲಿ ಓಡಿದರೂ ಆ ಮಂಚವನ್ನು ಹೊತ್ತುಕೊಂಡೇ ಓಡಬೇಕು. ಇಲ್ಲವಾದರೆ ಒಡಕು ಗಡಿಗೆಯಲ್ಲಿ ನೀರನ್ನು ಹೊತ್ತು ತರಬೇಕು. ತರುವಷ್ಟರಲ್ಲಿ ಅರ್ಧ ನೀರು ಸೋರಿ ಹೋಗುತ್ತದೆ. ಪುನಃ ತರಬೇಕು.

ಯಾವ ಕೆಲಸವನ್ನು ಆರಿಸಿಕೊಂಡರೂ ಕಷ್ಟ ಇದ್ದಿದ್ದೇ. ಕಷ್ಟಕರವಾದ ಕೆಲಸಗಳ ನಡುವೆ ಆಯ್ಕೆ ಬಂದಾಗ ಈ ಮಾತನ್ನು ನಿಮಗೆ ನೀವೇ ಹೇಳಿಕೊಳ್ಳಬಹುದು. ಮುರುಕು ಮಂಚವನ್ನು ಒಂದು ಕಡೆ ಇಟ್ಟು ದನ ಕಾಯ್ದರೆ ಆಗದೇ, ಹೊತ್ತುಕೊಂಡೇ ಏಕೆ ಕಾಯಬೇಕು ಎಂದು ಕೇಳಬೇಡಿ. ನನಗೂ ಗೊತ್ತಿಲ್ಲ. ಕಷ್ಟಕರವಾದ ಕೆಲಸ ಎಂದು ಹೇಳಲು ಹಾಗೆ ಬಳಸಿದ್ದಾರೆ ಎಂದು ಅನಿಸುತ್ತದೆ.